Vieiros

As xornadas Mar por Medio propuxeron na súa 16ª edición unha análise das posibilidades actuais de achegamento entre Galiza e Portugal no eido das industrias culturais e da comunicación. Mar por Medio trata de rachar coa idea rexionalizada e dependente de Galiza que os medios españois difundiron durante décadas en Portugal. Dous países con fortes vencellos históricos, culturais e lingüísticos incuestionábeis. Porén tiveron que ser actuacións de corte económico as que aumentaron o coñecemento da nosa sociedade no país veciño. Así, a creación da euro-rexión formada por Galiza e norte de Portugal e as actuacións derivadas permitiron a certos eidos da sociedade portuguesa ter un coñecemento máis próximo e, á cima de todo, máis fondo do noso país.

Olga Nogueira, coordinadora das xornadas canda a Xavier Campos, destacou que os debates partiron do recoñecemento dunha realidade, "de algo que xa sabiamos os axentes culturais: que por moito que a fronteira non exista, hai pouco coñecemento común entre os dous países". Dende esa base, estas xornadas serviron para comezar a traballar en proxectos conxuntos, e para estabelecer contactos persoais que poden dar os seus froitos nos vindeiros meses.

Nas xornadas tratáronse distintos asuntos, sempre coa vontade de escoitar voces de aquén e de alén do Miño, comparando e poñendo en común realidades e propostas de solución. Por exemplo, o venres falouse a xestión cultural, coa presenza de Miguel Martín, director da AGADIC, e de Helena Gil, directora regional de Cultura do Norte. Miguel Martín e Helena Gil mantiveron despois unha xuntanza para explorar as posibilidades de realizar programacións e proxectos de cooperación dentro dos programas de cooperación existentes, como o Interreg

O sábado foi o tempo dedicado á cultura e aos medios de comunicación, coa intervención na primeira mesa, a dedicada especificamente ao xornalismo, de Suso Iglesias, director da TVG, e dos periodistas portuguesas Domingos de Andrade (Jornal de Notícias) e Inês Nadais (Público). Os xornalistas portugueses recoñeceron que había moito por facer para corrixir a imaxe que os medios de comunicación portugueses ofrecen de Galiza. A visisibilidade das producións culturais galegas é escasa, e case sempre se identifican unicamente como obras 'españolas', case sempre mal recibidas e ligadas a conceptos de 'invasión cultural'. Porén, tamén se salientou que nos últimos tempos a prensa portuguesa, cando recolle unhas declaracións realizadas en galego, comeza a publicalas sen traducilas ao portugués.

Tamén se presentaron distintos proxectos culturais lusogalegos, como Audiência Zero (Pedro Cadima), Cantos na Maré (Vítor Belho) e Correntes d'Escrita (Luis Diamantino), e tamén espazos de produción e eshibición que teñen apostado por programar artistas de ambos os dous países, como o Maus Hábitos do Porto (Daniel Pires) e o Teatro Vila-Flor de Guimarães (José Bastos). Finalmente, a programación cultural e circulación artística entre Galiza e Portugal foi analizada por Vítor Belho, Consultor cultural, Carlos Seixas, Director do Festival Músicas do Mundo de Sines e Xosé Grajal, da Axencia Cultural Muxica. Alén dos debates, Narf e Manecas Costa puxeron a banda sonora musical, cun concerto que o sábado a noite encheu o Auditorio Hernán Naval de Ribadeo.

O domingo ao mediodía celebrouse un encontro profesional entre axentes culturais de ambos os dous países, que segundo Olga Nogueira foi un grande éxito e serviu para estabelecer moitos contactos, "notábase en moitos casos un 'descubrimento recoñecido', xente que non se coñecía en persoa pero que si coñecía as iniciativas creadas por uns e outros", destacou.