Vieiros

O ano pasado os países do sur entregaron case 440 mil millóns de euros aos do norte en concepto de pago da débeda externa. A cifra, que foi aumentando considerabelmente nas últimas décadas, é para os países debedores un peso que os priva de dedicar os seus escasos recursos a infraestruturas ou a programas sociais precisos.

Con esta reivindicación comeza a Semana de Acción Mundial contra a Débeda, preparada por varias ONG por todo o globo, para exixir aos chamados países ricos de occidente que condenen e perdoen a débeda ilexítima, así como a fin dos intereses que reciben Ifis (institucións Financeiras Internacionais) como o FMI, o Banco Mundial, os Bancos Rexionais de Desenvolvemento. Este ano tamén se pide o pago da débeda ecolóxica aos países do sur.

Até o de agora, os países do norte obviaron estas reclamacións, que comezaron a se ouvir con forza a finais dos oitenta, collendo máis volume hai unha década. Só en Noruega a mobilización social fixo posíbel a anulación da débeda externa de Ecuador, por un crédito que se demostrou era fraudulento.

A débeda que afoga
Os datos demostran que, de non haber débeda, moitos países poderían destinar unha parte importante do seu orzamento a proxectos necesarios. Para saber do significado que ten a débeda externa nalgúns países chega con botarlle unha ollada ás cifras. Por exemplo, en 2005 Bolivia destinou o 33% do seu orzamento total a pagar a débeda, e Ecuador o 28%.

Os intereses dos créditos varían segundo a solvencia do país endebedado, aínda que normalmente os acredores acostuman aproveitarse da debilidade financeira destes países e piden intereses desorbitados. E cando os países endebedados se negan a pagar, o que adoita suceder é que se ven inmersos nun bloqueo internacional, após o que comezan a ter grandes dificultades para obter novos créditos, situación que desemboca, normalmente, nunha crise financeira interna. México negouse a pagar en 1982, feito que terminou nunha crise internacional. Unha das insolvencias declaradas máis coñecidas foi a de Arxentina, no 2001, que tivo unha importante repercusión internacional.

O Estado español tamén é acredor dunha débeda de 8.495 millóns de euros sobre a que hai moito tempo que non se debate.

Algunhas datas importantes nesta semana
O pasado domingo 12 de outubro foi o Día Continental da Resistencia ao Colonialismo e o Neoliberalismo Neocolonial (en América Central e do Sur). Esta segunda feira, 13 de outubro, é o Día de Acción contra a Débeda, as Institucións Financeiras Internacionais e a Mudanza Climática. Na terza (14 de outubro) celebrarase o Día de Acción contra as IFIs, a Débeda e as Privatizacións. O día 15 será o Día de Acción pola Repulsa á Débeda (cabodano de Thomas Sankara, ex-presidente de Burkina Faso que pediu a condena á débeda xusto antes de ser asasinado). A quinta feira 16 de outubro será o Día de Acción para a Soberanía Alimentaria, e a sexta, 17 de outubro, o Día de Acción contra a Pobreza.