Vieiros

"Hai que devolverlles aos bancos a liquidez que necesitan e permitirlles que poidan obter financiamento a medio prazo, reforzando os fondos propios". Así explicaba este domingo o presidente de quenda do Consello da Unión Europea, Nicolás Sarkozy, as decisións tomadas polos países membros da zona euro durante a xuntanza en Francia, na que é a primeira iniciativa colectiva que toman diante do actual escenario de crise.

"Non se trata de facerlles un regalo aos bancos, senón de permitirlles o funcionamento", insistiu Sarkozy. Trátase dun marco común por baixo do cal cada estado membro poida adoptar o conxunto de medidas concretas que considere necesarias de acordo á situación específica dos seus mercados financeiros. O sistema de axudas públicas para a recapitalización dos bancos coa meta de que recuperen a liquidez está limitado até finais de 2009. Os líderes políticos insistiron na necesidade de que os bancos teñan garantidos os medios para poderen seguir prestando "a familias e empresas" co obxectivo de non paralizar a economía.