Vieiros

Vieiros de meu Perfil


Edición xeral

RSS de Edición xeral
MALIA AS MEDIDAS GOBERNAMENTAIS

As bolsas mundiais pechan a semana con caídas históricas

O G7 anuncia accións para frear a crise financeira mundial e evitar a caída do sistema, mais non especifica cales.

Redacción / EP - 10:22 11/10/2008
Tags: bolsas crise G7

As bolsas europeas pecharon a semana cos niveis máis baixos da súa historia, a pesar das medidas adoptadas contra a crise polos principais bancos centrais e gobernos do mundo occidental. De todas elas, liderou as baixadas o mercado de Madrid, que sufriu a baixada récord do 9,14%, que deixou o Ibex 35 en niveis de 2005, por debaixo dos 9 mil puntos.

O resto das bolsas europeas afudíronse entre un 8 e un 7 por cento por mor do pánico, sen que os bancos centrais puidesen neutralizar a súa ansiedade con inxeccións de liquidez e coas baixadas dos tipos de xuro. Londres caeu arredor do 8%, París un 7,7, Fráncfort un 7 e Milán un 6,5%, mentres Nova York caía un 4%.

A situación de pánico bursátil provocou un chamamento á calma do presidente estadounidense, George Bush, que asegurou que se tomaron medidas para estabilizar o sistema financeiro. Os xefes de finanzas do G7 prometeron tamén tomar medidas "decisivas" e traballar xuntos para frear a escalada da crise financeira global agoirada polo FMI.

O grupo dos sete países máis industrializados indicou que a situación require dunha "acción urxente e excepcional" e prometeu dar os pasos necesarios para desconxelar os mercados monetarios, aínda que non deu detalles sobre a súa natureza. O G7 tamén anunciou que se usarán todos os medios dispoñíbeis para previr que institucións importantes do sistema caian, e asegurar que os bancos poidan conseguir capital de fontes públicas ou privadas.


5/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: