Vieiros

O Festival Internacional Outono de Teatro celebra este 2008 os vinte anos do nacemento do grupo Ártabro Teatro. Faino cunha programación variada traerá a Carballo compañías galegas, españolas, italianas, belgas e portuguesas. O festival abrirase cunha compañía local, Talía Teatro, de Cee, cunha amplísima traxectoria ás costas, que o venres 10 representará Anfitrión, e ti quen ves sendo?. Tomarán o relevo os valencianos L'Om-Imprebís co seu Tenorio (o sábado), e Imprebís (domingo).

Nas semanas seguintes Teatro Meridional traerá La verdadera historia de los Hermanos Marx, Lagarta Lagarta Aeroplanos e Teatro delle Ariette Teatro da Mangiare?

Galicreques 2008
Noutros lugares de Galiza, os actores teñen pel de farrapo esta semana. O Galicreques 2008 divide os seus espectáculos entre Santiago, Lugo e diversas localidades das Mariñas, como Betanzos, Culleredo, Oleiros, Sada ou Bergondo. O Galicreques 2008 comeza o luns 6 e chegará até o mércores 15. Participan compañías galegas como A Internacional, brasileiras (Teatro Portátil), ecuatorianas (La Rana Sabia), alemanas (Theater PassParTu) ou francesas (Teatro Risorious)

En Compostela, de luns a venres, en sesións matinais, ofreceranse espectáculos para escolares. E cara á fin de semana poderase disfrutar de espectáculos para todos os públicos e mesmo algunhas funcións dirixiranse en exclusiva ao público adulto. Celebraranse tamén espectáculos de rúa, na praza de Praterías e na do Toural, e na Alameda mesmo se situará un camión da compañía francesa Teatro Risorius con capacidade para 45 espectadores que ofrecerá espectáculos o venres, sábado e domingo.