Vieiros

Vieiros de meu Perfil


Edición xeral

RSS de Edición xeral
A UE pídelles "responsabilidade"

O Senado dos EUA vota unha nova versión do plan de "rescate" financeiro

O eurocomisario de Comercio opina que os congresistas estadounidenses "perderon a cabeza".

Redacción - 11:15 01/10/2008

A estratexia electoral que condicionou o voto sobre o plan financeiro do goberno estadounidense na Cámara Baixa dos EUA influiría menos na votación que este mércores fará o Senado. Con só un terzo da Cámara Alta afrontando a renovación o próximo mes de novembro, a presión será menor neste caso. É un dos factores manexados por demócratas e republicanos que agardan que desta volta si sexa posíbel a aprobación que os congresistas lle negaron ao proxecto. A beizón dos senadores facilitaría tamén que o plan saia adiante cando volva ao Congreso.

O proxecto de "rescate" financeiro que os senadores votan desta vez introduce modificacións sobre a iniciativa anteriormente rexeitada, en forma de recortes de impostos, garantías fronte a creba para aforros de máis de 100 mil dólares e incentivos para o fomento do uso das enerxías renovábeis nas empresas. De feito, a iniciativa deseñada polo goberno Bush co consenso dos dous grandes partidos dos EUA foi incluída nun proxecto de lei sobre o sector enerxético, favorecendo así que os senadores lle poidan dar a beizón malia a negativa previa da Cámara Baixa.

Mentres, desde a Unión Europea, a Eurocomisión desafiaba este mates aos Estados Unidos a "asumiren a súa responsabilidade", indicando ademais a "decepción" polo rexeitamento inicial ao plan de "rescate". Unha crítica na que o máis belixerante foi o comisario de Comercio, o británico Peter Mandelson, quen opinou que os parlamentarios estadounidenses "perderon a cabeza". Ao tempo, durante a xornada, o Banco Central Europeo inxectaba durante a xornada até 190 mil millóns de euros para evitar problemas de liquidez na banca.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: