Vieiros

A euro-rexión Galiza-Norte de Portugal terá unha capital cultural bienal a partires do 2009, segundo se anunciou na primeira reunión desta comisión, que iniciou funcións o pasado mércores 17.

O obxectivo da nova asociación transfronteiriza é coordinar as súas iniciativas e sumar maior peso político e eficacia diante dos estados español, portugués e a UE. Mário Dorminsky asumiu a presidencia da Comisión de Cultura, mentres que a súa homóloga de Ferrol Yolanda Díaz será a vicepresidenta.

Na nova Comisión de Cultura serán admisíbeis todas as modalidades artísticas integradas na programación cultural dos concellos, dende a banda deseñada até a música, pintura, literatura, teatro, fotografía ou cinema.

O Eixo Atlântico fora creado en 1992, integrado por 18 concellos -nove de cada banda da raia- e foi medrando progresivamente até os 34 concellos actuais. A presidencia do Eixo Norte é rotativa e asumida alternativamente por municipios da Galiza e do Norte de Portugal, sendo hoxe presidente desta asociación Luís Filipe Menezes.