Vieiros

O exército ruso amosou o músculo militar até o final e cando o movemento das tropas ameazaba o contorno da capital de Xeorxia, Tbilisi, a presidencia rusa anunciou este martes a fin da operación militar.

A situación parece ir facilitar a medio prazo que Osetia do Sur cumpra o desexo do movemento separatista de afastarse do control xeorxiano e rematar uníndose a Osetia do Norte dentro da Federación Rusa. Así, a primeira esixencia desde Moscú é que as tropas xeorxianas que aínda quedan en territorio de Osetia saian da zona.

O presidente ruso, Dimitri Medvedev, afirmou que a fin das operacións actuais do exército teñen a fin de "forzar as autoridades de Xeorxia á paz". Con todo, o movemento chega pouco despois de que o ministro ruso de Exteriores rexeitase a declaración de paz promovida desde a Unión Europea e a Organización para a Seguridade e a Cooperación en Europa.