Vieiros

"Díxose moitas veces que Galaxia é máis que unha editorial", afirmou o presidente da Xunta, Emilio Pérez Touriño, no acto institucional de entrega da Medalla de Ouro de Galicia, "e, en efecto, entre nós, entre os galegos, a palabra Galaxia converteuse nun termo cunha riqueza de connotacións e significados que desborda os límites estritos da actividade editora”, engadiu.

Na súa intervención, o presidente indicou que Galaxia foi "desde o seu propio nome", a conexión entre Galiza e Europa. "Fronte a un réxime instalado nun ultranacionalismo casticista, pechado e uniformizador, Galaxia eríxese nunha ventá aberta á cultura europea". "O galeguismo volve facerse sinónimo do europeísmo, como querían os homes da Xeración Nós", reflexionou.

Durante o acto fíxose lembranza "daqueles galaxianos de primeira hora, cuxa achega intelectual e mesmo económica, foi decisiva para a posta en marcha do proxecto", citando a Manuel Gómez Román, Xesús Ferro Couselo, Antonio Fernández López, Sebastián Martínez Risco, Domingo García-Sabell, Marino Dónega, Álvaro Gil Varela, Ben-Cho-Sei, Xohán Ledo, Carlos Maside, e Carlos Casares.

"Por iso, coa entrega da Medalla de Ouro de Galicia, o Goberno quere recoñecer en Galaxia a todos os homes e as mulleres que contribuíron a outorgarlle a esta empresa un lugar propio na historia de Galiza, e ao tempo simbolizar neles a vocación de modernidade que segue a alentar hoxe nos continuadores do seu labor", concluíu a intervención do presidente da Xunta.