Vieiros

Vieiros de meu Perfil


Edición xeral

RSS de Edición xeral
Campaña destinada á mocidade

"A velas vir", na procura de lemas contra a SIDA

O Consello da Xuventude convoca un concurso de cartazes para unha campaña de prevención da SIDA.

Redacción - 09:30 23/07/2008

O Consello da Xuventude de Galicia ven de convocar o concurso de carteis "Estamos a velas vir..." coa finalidade de crear a imaxe e lema da nova campaña de prevención da sida para a mocidade.

O concurso está dirixido a mozas/os con idades comprendidas entre 14 e 35 anos e o seu obxectivo é favorecer a participación da mocidade no deseño de novos materiais informativos poñendo en práctica a creatividade, a linguaxe e o modo de entendernos entre os máis novos.

Esta campaña pretende reforzar a idea positiva da prevención nas relacións sexuais. O cartaz amosará unha información clara e sinxela para os xoves e ha contribuír á aceptación e normalización do uso do preservativo.

Hai que ter en conta

Valoraranse mensaxes que transmitan ideas e actitudes positivas, é dicir, evitarase basearse no medo e na ameaza. O público obxectivo da campaña é a poboación xuvenil. O lema do cartaz ha estar escrito en lingua galega.

O prazo de presentación rematará o 10 de outubro de 2008. Os proxectos deberán remitirse por correo electrónico ao seguinte enderezo: info@cxg.org. Os concursantes deberán cubrir e enviar xunto co seu cartaz un formulario que atoparán na web do Consello de Xuventude, onde tamén poden consultar as bases. A decisión do xurado farase pública o 15 de outubro de 2008 na web Consello da Xuventude.

O premio será de 1000 € para a persoa autora do cartaz gañador, máis un diploma acreditativo.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: