Vieiros

Coa decisión anunciada este mércores o vicepresidente da Xunta, Anxo Quintana, di querer axudar a "fixar unha posición firme e de país", facilitando a creación da subcomisión de infraestruturas. Deste xeito, Quintana renuncia a presidir a subcomisión e convida a liderar este instrumento á conselleira de Política Territorial, María Xosé Caride.

Deste xeito, Quintana pretende eliminar as susceptibilidades polos "protagonismos" xurdidas despois de que o BNG trasladase a Galiza unha iniciativa que continuaba a proposta realizada en Madrid no Congreso e rexeitada polo PSOE. O líder dos nacionalistas considera que con este xesto se poderían eliminar os obstáculos postos polo PSdeG, que presentara a súa propia iniciativa parlamentaria, fundamentada no liderado da conselleira fronte á negociación co goberno español.

Con todo, Quintana subliña que a tarefa desta comisión na súa primeira xuntanza cos representantes do executivo estatal debe ser "pedir que se ratifiquen os prazos e investimentos" comprometidos para a alta velocidade ferroviaria. Así, e no caso de que o goberno español confirme que o TAV non chegará a Galiza en 2012, desa xuntanza deberan saír "prazos e orzamentos" para a nova data que se fixe. Por outro lado, o vicepresidente sinalou tamén a súa vontade favorábel á participación do PPdeG nesta comisión, "sexa de forma directa ou indirecta".