Vieiros

Uns 300 alumnos participan este verán en 'campamentos bilingües' impulsados pola Xunta como parte dun programa de inserción lingüística "para superar esa materia histórica de Galiza, a aprendizaxe de idiomas", explicou Emilio Pérez Touriño este luns.

O idioma en cuestión é o inglés. Para comprobar in situ a marcha do programa, Touriño e máis a conselleira de Educación, Laura Sánchez Piñón, visitaron un campamento bilingüe nas Fragas do Eume, onde 50 alumnos asisten a un curso de lingua inglesa. Son estudantes de 6º de primaria que acudirán en dúas quendas.

A iniciativa "pioneira e innovadora", compleméntase con outras 200 prazas en campamentos bilingües fóra do país, concretamente en Carrión de los Condes (Palencia), nos que todo parece indicar que as dúas linguas serán castelán e inglés.

Potenciando un "ensino multilingüe"
Touriño indicou que se trata de "que os nosos rapaces e rapazas dominen e estean ben estabelecidos no proceso de aprendizaxe dun idioma estranxeiro, ademais do castelán e galego". Ademais, este verán convocáronse 2.500 prazas para estadías no estranxeiro para alumnos da ESO e Bacharelato en Francia e en Irlanda (300 alumnos en cada país), no Reino Unido (1.400) e, como novidade, en Canadá (500 prazas).

O presidente da Xunta explicou que se está a potenciar "un ensino multilingüe, onde a competencia lingüística en castelán e galego e nunha lingua estranxeira debe potenciarse e ser superada plenamente”. Neste senso, lembrou que 450 docentes están a realizar cursos específicos de lingua estranxeira no exterior, con estadías de entre 2 meses e 1 ano.