Vieiros

Unha biblioteca dixital brasileira, desenvolvida en software libre, está en perigo de pechar por falta de accesos. Dominiopublico.gov.br, unha iniciativa pública e aberta creada polo Ministerio de Educación do Brasil, ofrece non só libros dixitais, senón tamén imaxes, músicas e vídeos de balde.

Na rede xa se puxo en marcha unha campaña para promover o acceso ao sitio web, onde se inclúen, entre outras, 732 obras da literatura portuguesa, aínda que tamén hai, por exemplo, as Cantigas de Santa María de Afonso X O Sabio.

A alarma saltou co anuncio do goberno brasileiro de desactivar o proxecto por desuso, xa que o número de accesos é moi pequeno. Agora, estase a tentar que, mediante a divulgación a amigos, parentes e coñecidos, non morra unha ferramenta tan extraordinaria de difusión da cultura.