Vieiros

Franc3s fan música escura, pesada, densa, que ten o ruído como materia prima. Ruído modelado, construído, estruturado e perturbado que serve de músculo a letras surrealistas e sanguíneas que falan de miúdos, de órganos internos ou de putrefacción. Beleza escura. Influenciados por The Cramps, Joy Division, Suicide ou o lado máis escuro da movida madrileña, basean a súa posta en escena nunha batería, unha guitarra e uns teclados, deixando o baixo de lado.

Publicaron xa dúas maquetas e no verán chegará unha terceira; cancións coas que levan meses peregrinando por ducias de concursos de maquetas de todo o Estado. O pasado ano chegaron os primeiros éxitos, no concurso de maquetas do festival Contempopránea, e neste a consagración na escena maqueteira estatal, chegando ás semifinais do Proyecto Demo e, máis recentemente, á final do Concurso Galego de Maquetas 100 Pipers, cuxa final terá lugar en Compostela o 12 de xuño.

Son de Carballo e Vilalba e asumen o reto de "ante todo, ser absolutamente modernos", algo non sempre entendido por todo o mundo, "miráronnos sempre como bichos raros" -comentan- "agora seguimos sendo bichos raros, pero respectados". Son raros por varios motivos, comezando por ser unha banda de rock cunha maioría de integrantes femininas, algo que aínda non chegou a ser habitual na nosa música. "Non foi buscado", deixan claro, aínda que recoñecen que é algo que lles favorece, sendo un sinal de identidade do grupo, entre o machismo imperante.

Son raros tamén polo seu bizarrismo, tanto na súa vestimenta, as súas letras ou a forma simple e antitecnolóxica de entender a música. "Galicia é moi bizarra", afirman, "e se non o é máis é por un complexo de inferioridade". Esa Galiza Bizarra protagonizará o festival Sereas e Piratas, que terá lugar na praia de Razo, en Carballo, este verán. En xullo subirán ao escenario Franc3s, Justicieros, Jiménez Los Santos ou Novidades Carminha.