Vieiros

Vieiros de meu Perfil


Edición xeral

RSS de Edición xeral
A necesidade de variar o cálculo

O furado real dos petos: moito máis fondo cá foto parcial do IPC

A iniciativa do BNG para que o goberno español inclúa no Índice de Prezos do Consumo o custo da vivenda, volve poñer de actualidade as eivas deste cálculo.

Redacción - 09:00 05/05/2008
Tags:

Actualmente, o indicador que serve para as revisións salariais anuais, o IPC, non ten en conta o prezo de adquisición da vivenda. Malia que acceder a un fogar é cada vez un maior problema para as familias, esta variábel non se contempla como un produto de primeira necesidade.

O voceiro de Economía do BNG no Parlamento, Carlos Aymerich, presentou esta semana unha proposición non de lei para que o Goberno lle demande ao executivo español que teña en conta esta importante cuestión. O deputado nacionalista lembra que en moitos fogares é preciso até o 40% dos ingresos totais para facer fronte ás hipotecas. Mais Aymerich subliña tamén que o IPC actual "non ten suficientemente en conta o prezo de produtos básicos como a enerxía, a alimentación ou o transporte".

Un sistema que "penaliza os salarios máis baixos"
Hai xa catro anos, e nunha ponencia presentada nunha conferencia organizada pola Área de Economía do Seminario de Estudos Galegos, da que poden ler un resumo en Vieiros, o catedrático de Economía Aplicada da USC Xavier Vence xa advertía do problema co IPC.

Segundo Vence, o sistema de cálculo oficial "contribúe á perda do poder adquisitivo dos salarios". Na súa análise advirte por exemplo de que o feito de que non se contabilice o gasto en compra de vivenda e que o maior aumento dos prezos se dera naqueles produtos máis básicos da cesta da compra "favorece as desigualdades sociais e a perda do poder adquisitivo precisamente nas familias con menores ingresos".

Un cálculo alternativo que "duplica" o IPC real
Poñendo de manifesto os déficits do sistema actual de cálculo, naceu na rede o espazo web IPC Real, onde se elabora periodicamente un índice de prezos ao consumo alternativo ao IPC oficial.

Os autores desta web propoñen un cálculo baseado nos "gastos ineludíbeis nunha familia modesta", fundamentalmente alimentación, recibos de gas, auga ou luz e gasolina, e suprimen por exemplo xoiería, accesorios de xardín ou mesmo cirurxía estética, factores que paradoxalmente si son considerados no cálculo do IPC oficial.

Seguindo ese sistema, no mesmo período en que o INE determinou que os prezos a nivel estatal causaron no mes de marzo unha inflación do 4,6% interanual, este rexistro apunta un "IPC real alternativo interanual do 8,34%".


5/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: