Vieiros

Ningunha universidade galega supera o 20% da docencia en galego, segundo denunciou A Mesa pola Normalización Lingüística. Só a universidade de Compostela chega a esta porcentaxe, namentres que a de Vigo fica no 16% e a da Coruña, no 10%.

O presidente da asociación, Carlos Callón, e mais o responsábel de Mocidade, Fran Rei, presentaron esta cuarta feira na Coruña un informe elaborado polo Observatorio de Dereitos Lingüísticos onde se denuncia que o Estado español segue a incumprir a Carta Europea das Linguas Minoritarias, aprobada por unanimidade no parlamento español en 2001.

Este informe, que xa foi enviado ao Consello de Europa, recolle tamén algunha das reivindicacións centrais da manifestación nacional que, baixo o lema Polo dereito a vivirmos en galego, percorrerá as rúas da capital do país o vindeiro 18 de maio, e que dende a asociación agardan sexa "histórica".

A Mesa lamentou que "moitos alumnos" poidan empezar e rematar unha carreira "sen escoitar unha palabra de galego", dado que o profesorado "non ten a obriga de coñecer a lingua propia". "Moitos (alumnos) teñen que renunciar ao idioma para non ter problemas coa avaliación", reprobou Callón.

Requisito para acceder á docencia
Xa que logo, reclamaron como medidas urxente para o cumprimento da Carta Europea das Linguas que se estabeleza un "plan de formación lingüística para o profesorado", que se estipule "o coñecemento do galego como un requisito para o acceso á docencia universitaria" e que se "estabelezan uns mínimos de produción científica en galego nas universidades".

Por último, a Mesa denunciou o "incumprimento masivo" do novo decreto do ensino. "Hai algúns centros nos que se están a impartir materias en castelán que se tiñan que impartir en galego xa desde os anos oitenta, como é o caso de Xeografía e Historia", dixo Callón.