Vieiros

En lembranza do primeiro Congreso Mundial Xitano, celebrado en Londres en 1971, nace o Día Internacional dos Xitanos. Nesta data faise memoria sobre as vítimas do holocausto nazi, e en xeral sobre todas as vítimas deste pobo, orixinario da India, ao longo do seu proceso migratorio. Con este motivo, a Fundación Secretariado Xitano (FSG) invita as institucións públicas e a toda a sociedade a sumarse á celebración para "coñecer mellor a estas persoas" e seguir avanzando na consecución da súa "cidadanía plena" e do seu "recoñecemento institucional e cultural".

Dende a fundación explican que existen "grandes progresos" en canto a promoción social e cultural dos xitanos nos últimos anos, e que isto ten que facerse ver ao resto da sociedade, evitando así unha visión estereotipada do colectivo por parte da opinión pública. Aínda así, lamentan que "continúen existindo importantes lagoas" na promoción de igualdade de oportunidades e na erradicación da discriminación en áreas como o emprego, a educación, a saúde ou a vivenda.

O 2007 foi para o colectivo xitano un ano de avances, especialmente en canto a recoñecemento institucional e cultural, coa consolidación do Consello Estatal do Pobo Xitano e do Instituto de Cultura Xitana, mentres que este 2008, considerado o Ano Europeo do Diálogo Intercultural, supón un marco idóneo para a sensibilización dos cidadáns dos retos que implica a aceptación da diversidade cultural.