Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Feira Internacional

A literatura infantil galega deixa a súa pegada en Boloña

Cultura e o IBBY aproveitan este contexto para firmar un convenio de colaboración a prol da literatura para os máis pequenos.

Redacción - 13:15 31/03/2008

Comeza a 45 edición da Feira de Literatura Infantil e Xuvenil de Boloña, e este ano vén cargada de achegas galegas. Preto de cen títulos e case unha vintena de editoriais representarán as nosas letras até o vindeiro 3 de abril nun stand que conta coa participación da Consellaría de Cultura e da Asociación Galega de Editores.

A través desta feira, búscase ofrecer novas saídas para literatura infantil e xuvenil galega, nun encontro no que participan máis de 66 países, 5.000 profesionais e 1.300 expositores. Para facilitar a promoción, a Dirección Xeral de Creación e Difusión Cultural publicou materiais promocionais entre os que se atopa un catálogo que baixo o título de Galician Books for Children & Young Adults 2008 compila un cento de títulos editados en galego no noso país.

Convenio co IBBY


Aproveitando este contexto, a Consellaría de Cultura asinará un convenio de colaboración co IBBY, a máxima institución internacional para a promoción, patrimonio e defensa do libro infantil. A conselleira deste departamento, Ánxela Bugallo, tamén fará entrega dun dos Premios Hans Christian Andersen do IBBY, e asistirá a entrega dos galardóns aos mellores libros de 2007 no que se lle entragará a mención de honra á editorial galega OQO, por O gran libro dos retratos de animais.

Pola feira pasarán tamén Xabier P. Docampo, que presentará a revista internacional de arte e literatura infantil Bloc o día 1 de abril, e a escritora María Reimóndez, que fará o mesmo coa tradución ao italiano do seu último libro, Il club della calzetta.


4,14/5 (7 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Imaxes da Feira na anterior edición
Imaxes da Feira na anterior edición
'O gran libro dos retratos de animais' recibe a mención de honra
'O gran libro dos retratos de animais' recibe a mención de honra