Vieiros

Os tres grupos aprobaron este venres por unanimidade na Comisión Institucional do Parlamento o informe do relatorio sobre a proposición de lei para reclamar a transferencia a Galiza das competencias en materia de tráfico, que en principio vai ser aprobado este mes.

Posteriormente, a Mesa do Parlamento deberá remitir a proposición da Cámara á Mesa do parlamento español, que decidirá a súa entrada a debate en Cortes.

A propia iniciativa inclúe a vontade dos grupos de que o proceso de transferencia "comece con moita brevidade co fin de completarse no horizonte de 2010".

O portavoz do BNG, Carlos Aymerich, dixo agardar que no parlamento español haxa "a mesma unanimidade" que houbo no galego.

Pola súa banda, o voceiro do PSdeG, Ismael Rego, aínda que augurou que a proposición "terá un amplo apoio e aval", advertiu de que o Congreso ten "soberanía" para tomar decisións.

Finalmente, o parlamentario do PPdeG Antonio Rodríguez Miranda explicou que o exercicio de máis competencias é favorable "só na medida de que os galegos poidan vivir mellor", como é o caso.