Vieiros

Vieiros de meu Perfil


Edición xeral

RSS de Edición xeral
Acordo PPdeG-BNG-PSdeG

A Policía Autonómica controlará todo o Tráfico do país en 2010

Os tres grupos redatarán unha proposición de lei conxunta para reclamarlle a competencia ao Estado. Fica fóra a expedición de licenzas de circulación.

Redacción - 11:25 04/12/2007

Os tres grupos do Parlamento, PPdeG, PSdeG e BNG, acordaron este luns á tarde redactaren unha proposición de lei conxunta para reclamarlle ao Estado Español as competencias de Tráfico.

Será a Policía Autonómica a encargada de controlala, cando o corpo complete o seu despregamento en todo o país, no horizonte do ano 2010. Até o daquela, serán os axentes da Garda Civil os encargados destas atribucións.

No entanto, a potestade de expedir e revisar as licenzas de circulación e os permisos de conducir de vehículos e de ciclomotores continuará en mans do Estado a través da Dirección Xeneral de Tráfico.

Valoración do Goberno

O vicepresidente do Goberno, Anxo Quintana, que convocou e participou na reunión, salientou que con este novo sistema, Galiza disporá do "mesmo nivel de competencias" en materia de tráfico que Cataluña e Euskadi.

Esta mesma semana agárdase que se peche a redacción definitiva do borrador lexislativo, co obxectivo de darlle a "máxima" celeridade á súa aprobación. Porén, Quintana recoñeceu a posibilidade de que o parlamento español non o debata até despois das eleccións xerais de marzo.

O vicepresidente incidiu en que esta iniciativa recolle "o sentimento maioritario" da cidadanía galega, que, ao seu xuízo, "quere estar ao mesmo nivel que as outras nacións do Estado, Euskadi e Cataluña".

Valoración dos tres grupos

O portavoz do PPdeG, Manuel Ruiz Rivas, indicou que o obxectivo é que o despregamento da policía galega se produza en todo o territorio ao mesmo tempo.

O voceiro do BNG, Carlos Aymerich, considerou que non ten senso que a Policía Autonómica non asuma as competencias sobre expedición dos permisos de conducir e as licenzas de circulación, "por razóns de economía e duplicidade".

O deputado do PSdeG Xaquín Fernández Leiceaga foi máis alá que o propio Quintana, e asegurou que a Xunta contará con máis competencias que os gobernos vasco e catalán, xa que regulará as actividades formativas e xestionará as sancións.


5/5 (8 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: