Vieiros

Representantes dos gobernos español e vasco e dirixentes de todos os partidos agás de ANV secundaron a concentración convocada en Arrasate ás 12.00 horas para expresaren o seu rexeitamento a ETA e arroupar a familia de Isaías Carrasco, o ex concelleiro socialista asasinado este venres.

Arredor de medio milleiro de persoas concentráronse ás 12:00 ante o concello. Dentro, no salón de plenos está instalada a capela ardente cos restos mortais de Carrasco, informa EiTB.

Encabezaron a concentración familiares do ex edil asasinado, entre os que estaban a súa esposa e unha das súas fillas, Sandra. Ao termo, esta última leu un comunicado onde agradeceu o apoio do pobo de Arrasate, "o agarimo, apoio e calor que está a amosar a xente anónima coa miña nai e cos meus irmáns."

"O meu pai morreu por defender a liberdade, a democracia e as ideas socialistas. Era un home valente que deu a cara e os que o mataron son uns covardes. Uns covardes sen collóns", dixo. Ademais, advertiu que non permitirán que o asasinato do seu pai sexa manipulado por ninguén.

"Os que queiran solidarizarse coa nosa dor, que acudan masivamente a votar o domingo. Para dicirlles aos terroristas que non imos dar nin un só paso atrás", concluiu.

Presenza institucional
O presidente vasco, Juan José Ibarretxe, e a vicepresidenta española, María Teresa Fernández de la Vega, participaron en representación de ambos os dous gobernos.

Tamén asisten á concentración o presidente do PSOE, Manuel Chaves; a presidenta do PP vasco, María San Gil; o presidente do PNV, Iñigo Urkullu; o líder de Esquerda Unida, Gaspar Llamazares; o presidente de EA, Unai Ziarreta; e o secretario xeral de UXT, Cándido Mendez.