Vieiros

Vieiros de meu Perfil


Máis Alá

Xestionado por Vieiros
RSS de Máis Alá
'VALDEMULLER' ESTREA EN OURENSE

Os monicreques volven ao CDG

O Teatro Principal acolle a primeira representación da nova obra do Centro Dramático Galego, este venres 15 ás oito e media da tarde.

Redacción - 09:00 13/02/2008

Valdemuller é unha montaxe de monicreques dirixida polo arxentino Pablo Vergne a partir da novela de Xosé A. Neira Cruz. É a primeira vez en once anos que Ourense acolle unha estrea absoluta do Centro Dramático Galego. Tamén había catorce anos que o CDG non realizaba un espectáculo de monicreques, despois da produción de O Mariscal, dirixida por Marcelino de Santiago "Kukas" en 1994.

O arxentino Pablo Vergne é un recoñecido mestre das montaxes de monicreques, que uniu a súa calidade e talento estético á tradición galega neste eido. Vergne caracterízase por un estilo singular que combina tradición e innovación, economía de medios e máxima expresividade, exploración de materiais e reciclaxe de obxectos, na procura de novas linguaxes escénicas e da complicidade co público.

A historia de Valdemuller dá comezo cando a familia de Mina, que cumpre quince anos, prepara unha festa de aniversario con posta de longo incluída, que non é do gusto da rapaza. A sorte fai que algúns dos tópicos da festa sufran certos cambios involuntarios, como o acontecido co elegante traxe que lle tiñan preparado. Un agasallo misterioso desencadea unha investigación.

55 funcións en todo o país
Tras as cinco funcións de Ourense, o CDG iniciará unha xira con este espectáculo que se prolongará até maio e durante a cal será escenificado para o público xeral en Narón (Auditorio Municipal, 22 e 23 de febreiro), Tui (Teatro Área Panorámica, 29 de febreiro), Pontevedra (Pazo da Cultura, 5 de marzo), Compostela (Salón Teatro, do 26 de marzo ao 20 de abril), Vigo (Centro Cultural Caixanova, 17 e 18 de maio) e Ferrol (Teatro Jofre, 25 de maio). Están programadas, ademais, outras 27 representacións máis para institutos en Narón, Tui, Pontevedra, Carballo, O Barco, Vilagarcía, Ribadeo e Ferrol.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: