Vieiros

O alcalde de Cervantes (Os Ancares), Benigno Gómez Padín, do PSdeG, asegurou esta segunda feira que vai tentar traer, outra vez, a caravana de mulleres ao seu concello, despois de se ter suspendido a prevista para o pasado domingo.

Gómez Padín tamén destacou que vai "tentar facer unha festa de solteiros", tras recoñecer que é problemática a situación do concello, con 500 solteiros nun censo de 1.800 habitantes.

O BNG tamén ten as súas "caravanas de xubilados"
Sobre as críticas do BNG sobre a caravana de mulleres, Padín asegurou que é normal velas en moitas vilas por todo o Estado, posto que "se trata dun encontro, non é máis nada, e pode xurdir ou non", afirmou, ao tempo que acusaba aos nacionalistas de "retrógrados".

O secretario provincial do PSdeG en Lugo, Luis Anxo Lago, preguntoulle ao BNG se para eles tamén son "indignas e denigrantes" o que describiu como "caravanas de xubilados que percorren Galiza para aplaudirlle a Quintana, ao estilo do que facía Fraga hai uns anos".

Contra a postura "sectaria e de talibáns" do BNG
Lago tamén dixo que cada vez se entenden menos "posturas tan intransixentes" como a amosada polo BNG que "condena sen máis idea e de forma inapelábel os actos doutras persoas sen sequera darlles tempo a se defenderen".

Así, para o socialista lugués, a do Bloque é unha posición "absolutamente sectaria e de talibáns". "Son moi dados a lanzar proclamas e condenas incendiarias contra os demais, sen mirarse no espello", concluiu Lago.