Vieiros

A praza de Lisboa de Porto, próxima á Torre dos Clérigos, atópase en estado de abandono nestes momentos, con tendas baleiras (restos do que foi a Clérigos Shopping) e é decote obxecto de actos vandálicos. A praza acollerá a meirande libraría de Portugal, unha nova libraría Byblos, que o pasado ano inaugurou o seu centro en Lisboa e que ten en proxecto a apertura de novas sedes no país.

A Byblos de Porto terá máis de 150 mil volumes e estará construída maioritariamente con cristal, permitindo observar o seu interior dende fóra. A nova libraria ficará á sombra da Torre dos Clérigos, un dos símbolos maiores da cidade do Porto, e terá como veciña unha das mais bonitas casas libreiras de todo o mundo: a centenaria Livraria Lello.