Vieiros

Ademais de ter a banda máis antiga de Galiza, Merza é coñecida pola súa celebración do Entroido. Estas festas son a excusa dos habitantes desta parroquia de Vila de Cruces para saíren á rúa e seguir as directrices dos xenerais, os mouros e o frade. Precisamente isto é o que poderemos ver na mostra sobre este entroido exposta na compostelá casa de Comidas O Dezaseis.

Do 11 ao 25 de xaneiro, todos os que se acheguen até o local que ocupa na rúa de San Pedro, poderán ver as instantáneas máis representativas desta festa que acadou sona en todo o noso país. As fotos dos xa tradicionais "vivas", e das carrozas, charangas e grupos conforman esta exposición que xa nos vai preparando para o vindeiro Entroido.