Vieiros

Foi un dos compromisos arrincados este luns pola CIG-Ensino da xuntanza coa conselleira de Educación: a necesidade de que a consellaría atenda de xeito específico os requirimentos da normalización lingüística nas escolas do país. Así o falaron a conselleira de Educación, Laura Sánchez Piñón, xunto co secretario xeral da consellaría, Benito Fernández, e os representantes da CIG-Ensino, Anxo Louzao, Marta Dacosta e Xosé Luís Rivera.

Iso si, a formación sindical maioritaria entre os docentes chegaba á reunión cunha proposta concreta: convidaban a que, cando menos, Educación estabelecese unha Subdirección Xeral de Normalización que liderase esa tarefa. A xuntanza non deu de si un compromiso específico ao respecto, pero desde a Xunta si recoñecen a necesidade de que exista a curto prazo algún tipo de fórmula interna para o despregue dese labor. Desde a CIG-Ensino insisten en que se trata ademais dun momento especialmente delicado, logo da aprobación do decreto sobre a lingua nas escolas.

Flexibilización a prol da "xornada única"
Máis axiña parece que chegará solución á demanda ao respecto dos problemas para a extensión da xornada única nas aulas do país. Así, Educación recoñece a necesidade de que xa neste trimestre inicial do curso se comecen a estabelecer os criterios que favorezan a introdución progresiva da xornada única en todos os centros de Infantil e Primaria do país, corrixindo os atrancos existentes na actualidade.

Segundo explicou para Vieiros o secretario xeral da CIG-Ensino, Anxo Louzao, entre as demandas coas que chegaba a formación sindical maioritaria entre os docentes, están tamén outras cuestións sobre as que a Consellaría de Educación amosou vontade de negociar a curto prazo. É o caso das condicións de traballo do profesorado itinerante, as gratificacións aos mestres por xubilación e as negociacións sobre o Estatuto Galego do Profesorado.

Por outra parte, a consellaría mantense inflexíbel sobre outra das demandas sindicais: o restabelecemento da xornada reducida en xuño e setembro. Malia a insistencia desde a comunidade educativa na petición de volta ao modelo anterior, cunha folga de elevado seguimento incluída, a consellaría non abrirá negociacións sobre este tema. Tampouco haberá conversas polo momento no que lle toca á solicitude de estabilidade para o profesorado interino. Consideran desde o sindicato que dándolle as costas ás que son "algunhas das demandas máis sentidas do profesorado", seguirán os "conflitos permanentes até a súa resolución".