Verdegaia denuncia o excesivo alumeado de nadal que se vai instalar este ano na cidade de Vigo
Sen dispor dos datos concretos, e estimando que cada motivo está formado por unhas 400 lámpadas de 25 watios cada unha, temos un consumo total por hora de cidade “iluminadalizada”duns 40.000 kilowatios-hora. Isto significa que Vigo provocará a emisión dunhas 20 toneladas de CO2 por cada hora de funcionamento deste “marabilloso” alumeado de nadal.
Dende Verdegaia preguntámonos se tanto os responsables políticos como a cidadanía en xeral somos conscientes do custe desta actuación. Sabemos que este alumeado lle vai custar aos vigueses uns 3600 euros por hora, mais o prezo máis alto vaino pagar o planeta, xa que coas emisións que provocará Vigo contribuirá en grande medida a agravar o problema, xa crítico de por si, do cambio climático que estamos a padecer, ademais das problemáticas ambientais derivadas doutras formas de obtención de enerxía (encoros, minicentrais hidroeléctricas,...).
Dende Verdegaia-Vigo solicitamos á administración municipal que limite, cando menos, o número de horas de funcionamento das citadas lámpadiñas e esiximos que mude as súas políticas habituais para facer real o seu ingreso na Rede Española de Cidades polo Clima, ingreso aprobado polo pleno do Concello de Vigo en 2006 a petición da nosa asociación que presentou unha moción municipal sobre cambio climático titulada Estratexia Municipal fronte o Cambio Climático.
Cómpre lembrar que a actividade desta Rede está dirixida á promoción das políticas de desenrolo sostible e ó impulso de políticas locais de loita contra o cambio climático que contribúan á redución de emisións de gases de efecto invernadoiro e ó cumprimento do Protocolo de Quioto.
O cambio climático, consecuencia da intensificación do efecto invernadoiro inducida pola especie humana, é xa unha realidade. O Panel Intergobernamental sobre Cambio Climático (IPCC), adscrito á Organización de Nacións Unidas (ONU) e formado por máis de 2.000 científicos de todo o mundo, asegura que o cambio climático global xa comezou e que as accións para mitigalo e adaptarse a el son urxentes. Os estudos dispoñíbeis até agora amosan que, se non se reducen na medida necesaria as emisións de gases de efecto invernadoiro, o cambio climático inducido tería consecuencias consecuencias moi negativas tanto localmente en Galicia como globalmente no conxunto do planeta.
As emisións de gases de efecto invernadoiro en Galicia medraron un 45,9% entre 1990 e 2005, este espectacular incremento é un dos motivos polos que España é o estado da Unión Europea máis afastado do cumprimento do Protocolo de Quioto. Aliás, as emisións por habitante en Galicia figuran entre as máis altas de Europa e do mundo. Boa parte destas emisións teñen lugar nas vilas e cidades, onde vive o 70% da poboación galega.
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto