Vieiros

No Concello de Ferrol non están dispostos a pasar por alto a publicación dunha viñeta na que a protagonista é a tenente de alcalde, Iolanda Díaz (EU). Dende o departamento da Muller entenden que a publicación 'Ferrol Hoy' trata á tenente de alcaldesa como unha “muller-obxecto” e con evidente “misoxinia”.

A viñeta, obra de Julio Ferrín y Centeno, debuxa a Iolanda Díaz en roupa interior. Logo, a modo de deseños recortábeis e baixo o título de “Iolanda, vístea ti mesmo” propón diferentes modelos: “Iolanda drag queen”, “Iolanda revolucionaria”...Mais a publicación vai tamén acompañada dunha editorial na que se lanzan supostas mensaxes “machistas”.

Este xornal púxose en contacto coa propia Iolanda Díaz. A tenente de alcalde asegurou estar molesta coa mensaxe que transmite a publicación: “Parece que para ser política hai que empregar escote”. A pesar de que a propia afectada considera que é fondamente “machista” o tratamento que se fai da súa figura, subliñou que non quixo denunciar persoalmente o feito para non darlle “publicidade gratuíta”. Porén, di que a idea de trasladar o ocorrido ao Servizo Galego de Igualdade e ao Instituto da Muller partíu de colectivos feministas da cidade, que consideran intolerábel o sucedido.