Vieiros

Unha ducia de colexios nas cidades inglesas de Manchester e Londres están a desenvolver con gran éxito un innovador proxecto educativo para aprenderlles a ler e a escribir a nenos con problemas de dislexia. Tanto é así que está previsto se amplíe a todo o país, segundo informa o diario The Independent este martes.

A organización Springboard for Children, que conta co respaldo da Asociación Británica da Dislexia, encárgase de levar a cabo este plan que conseguiu até o de agora taxas positivas de ao redor do 90%.

Os alumnos disléxicos -ou con outros problemas de aprendizaxe na lectoescritura- son atendidos por este servizo de educación especial unha vez rematado o primeiro período do curso, e regresan ás clases regulares tras un período medio de dous anos.

A clave destes resultados tan positivos reside na actuación inmediata e na atención individualizada durante o período de aprendizaxe coa utilización de métodos e técnicas innovadoras para mellorar as habilidades dos cativos. Estas baséanse en afianzar a autoestima dos alumnos, deteriorada pola angustia e frustración anterior.