Vieiros

Os produtores de leite confían en que o prezo do produto subirá até que os gandeiros cobren uns 60 céntimos de euro por litro. Así o asegurou o director xeral da Federación Española de Empresarios Produtores de Leite (PROLEC), Carlos Gil, quen detectou unha “predisposición alcista” dos prezos. O obxectivo de acadar os 60 céntimos por litro de leite acadaríase nun prazo de dous anos se se mantén a tendencia á suba.

Segundo o empresario, os prezos dos produtos lácteos están a aumentar polo aumento do consumo en países como a China e a India, “onde antes non había demanda”. Gil asegurou que “non hai razón obxectiva xustificábel” para que non continúe a tendencia alcista “porque hai escaseza de vacas e de leite en todo o mundo”.

O director xeral de PROLEC anunciou que, no Estado Español, o consumo de leite descendeu até os 82,4 litros por habitante e ano e que, do millón de vacas de leite, un terzo son galegas.