Vieiros

Hai tempo que se está a traballar na idea de crear unha Academia da Língua Portuguesa en Galiza mais agora as cousas van tomando forma, aínda que non hai présa, xa que, segundo lle contou a Vieiros, Ângelo Cristóvão, un dos responsábeis e promotor da Academia, é unha cousa "que se vai facer para moito tempo", e non importa o que demore creala.

O proxecto formal non foi presentado propiamente, mais a comisión xestora da Academia, entre a que se atopan profesores universitarios -non só de filoloxía-, algunhas asociacións, entidades, empresarios e outros profesionais -moitos levan 30 anos dedicados a isto, así que a cousa vén de vello-, ten pensado telo todo listo para o ano que vén.

Na pasada semana organizaron unha serie de palestras nas que participaron os profesores Evanildo Bechara, da Academia Brasileira de Letras, e Malaca Casteleiro, da Academia das Ciências de Lisboa, que ademais viaxaron a Galiza para darlle o seu apoio á iniciativa académica.

Sen darlle contas á RAG
A Academia vai funcionar como unha entidade privada, sen darlle contas a ninguén, nin sequera á RAG. "Vai ser unha cousa seria, non un chiringuito como a RAG. Temos a vontade de facer unha Academia a serio", díxolle a Vieiros Cristóvão, "chegamos un século tarde, mais temos a experiencia acumulada de outras academias e o consenso e a unidade deste lado da perspectiva da lingua", salientou.

Os promotores da Academia da Língua Portuguesa en Galiza cren que o galego forma parte da lusofonía, e como tal debe ser considerada, como parte do portugués actual. Para eles non é unha lingua independente e o que outras academias están a facer por ela, como a RAG, é deturpala, castelanizala e facer un híbrido estraño, irmán do castelán. Isto só levaría, segundo Cristóvão, á súa desaparición: "que se conciba o galego de xeito distinto ao portugués é a principal condición para a súa desaparición. O galego non debe ser un dialecto do español".

O castrapo, na base da desaparición do galego
Sobre a perde de falantes e o medo a que desapareza o galego, o castrapo é para Cristóvão unha das principais causas: "Algunhas entidades como Política Lingüística din representar ao pobo e maniféstanse en contra doutras normativas que non sexa a súa. Aínda imos ter culpa os reintegracionistas de que desapareza o galego! Din representar ao pobo pero fan a normativa do castrapo e logo aínda lle botan a culpa ao pobo de que a lingua desapareza".

"Nós traballamos pola defensa e a ilustración da lingua. Non contra ninguén, xa que pretendemos defender o noso punto de vista dunha maneira máis formal e institucionalizada", terminou Ângelo Cristóvão.

Símbolo da unidade e integración da lingua galega no portugués
Outro dos promotores da Academia, Martinho Montero Santalha contoulle a Vieiros que a entidade está a dar aínda os primeiros pasos para a súa legalización e van "levando para adiante a cousa" que "vai indo ao seu ritmo".

A Academia vai funcionar, en palabras de Montero Santalha, como "símbolo da unidade e integración da lingua galega no portugués e dos que isto defendemos dende Galiza", e nace "para agrupar aos que defendemos que Galiza pertence ao mundo da fala portuguesa e que sentimos que a última evolución da RAG non vai por aí, senón na liña contraria. Facer do galego unha lingua independente seria un suicidio cultural e levaría á morte da lingua".

"Noutra parte", continúa Montero Santalha, "é importante e é útil que o mundo lusófono se coñeza entre si. Hai moita desinformación e é precisa máis solidariedade, máis información, máis axuda que un organismo como a Academia pode axudar a crear".