Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Manolo Soto, membro da SDC do Condado

"No Festival chámaselles ás cousas polo seu nome, por iso temos tantos detractores"

Ducias de autores líricos, plásticos e audiovisuais aterran esta fin de semana en Salvaterra de Miño para participar nun 'Festival da Poesia do Condado' que non perde o seu carácter reivindicativo.

Redacción - 13:00 31/08/2007

Co lema Ajustiçar a História, Ganhar Dignidade deu comezo esta quinta feira o Festival da Poesia do Condado en Salvaterra de Miño. Concretamente a vixésimo primeira edición, aínda que xa pasaron 26 anos de vida dende o seu nacemento.

Vieiros conversou cun dos seus organizadores, Manolo Soto, da Sociedade Cultural e Desportiva (SCD) do Condado, para saber que novidades poden atopar os visitantes esta fin de semana e, entre outras cousas, porque durante cinco anos a comarca do Condado viuse privada da lírica.

Vieiros: Que novidades podemos atopar este ano no Festival?

Manolo Soto: Todos os anos hai innovacións porque a poesía é algo que está a mudar e a innovar constantemente. Porén, o máis importante segue a ser o recital poético e musical do sábado. O Festival está adornado coas actividades de pintura, coa feira popular, ... que o arroupan.

Nesta edición contan vostedes coa sección Micro Aberto para que calquera asociación que teña algo que dicir ou denunciar, que o faga, mais cun tempo limitado de cinco minutos ...

Ben, realmente non é tan novidoso porque noutros anos sempre reservamos un tempo ou un determinado momento para que se alguén quere facer unha queixa publica, contra o Concello, ou contra quen sexa, que o faga.

Igual colle o micro algún de 'Tan gallego como el gallego' ...

Non creo que ousen. Non sei se lle gustaría moito ao público.

E a xente da vila, implícase co Festival?

Tanto o Festival como a Sociedade Desportiva e Cultural do Condado teñen xente que os apoia, mais tamén temos bastantes detractores. Hai que ter en conta que a poesía xa é de por si reivindicativa, e neste festival, que de sempre foi reivindicativo, chámaselles ás cousas polo seu nome. Ademais, este ano que está adicado a Memoria Histórica, comprenderás que é un tema que pode molestar.

A deste ano é a vixésimo primeira edición, mais a primeira vez que se celebrou este evento foi hai 26 anos. Como se explica isto?

O Festival da Poesia do Condado naceu no ano 1981, e se repetiu en anos seguintes até 1996. Neste ano e deica o 2001, cando se volveu retomar, non se puido organizar por falta de cartos. Daquelas, tanto o Concello de Salvaterra como a Deputación de Pontevedra foron por nós e afogáronnos economicamente durante cinco anos.

E actualmente teñen algún tipo de apoio económico?

Temos unha pequena subvención do concello, que nos dá 6.000 euros, e con axudas da Xunta, do Xacobeo e do Porto de Vigo, que en total serven para pagar o 40 ou 45% do festival. O resto sacámolo de diferentes actividades que facemos durante todo o ano, do bar que montamos estes días, de vender camisolas ...

Ademais do que recadan coas entradas do concerto. Este ano actúa a portuguesa Filipa Pais, non si?

Cada ano dedicamos unha noite a un dos países da lusofonía. Nesta edición tocoulle a quenda a Portugal; outros anos trouxemos xente de Cabo Verde ou das Azores.

Cambiando de tema, a SCD quere facer nesta edición lembranza especial de Antom Martínez, Tonhi ...

Tonhi
é un mozo que lamentabelmente nos deixou o ano pasado. Foi presidente da SCD e un dos grandes responsábeis do rexurdimento do Festival do Condado na súa segunda xeira. Coido que é importante lembrar non só a historia pasada, que está moi ben, senón tamén a nosa historia recente.

Que expectativas hai na asociación sobre a afluencia de público para este ano?

O ano pasado vímonos abraiados pola cantidade de xente que veu, ao redor de 7.000 persoas o venres e 5.000 o sábado, e a verdade é que nos superou, porque estábamos afeitos a recibir entre 1.500 e 3.000 persoas. Nesta edición contamos cunha asistencia similar á de 2006, e estamos máis preparados para recibilos.

O ano pasado púxose en marcha un servizo de transporte gratuíto. Este ano tamén o hai?

Tamén. Hai trens dende Vigo, con paradas en Redondela, en Porriño e en Guillarei, e autobuses dende Mondariz, con paradas en Ponteareas e en Fornelos, e dende Tui, con paradas en Caldelas e Salceda. Ademais temos unha zona de acampada e o tempo, se non se trabucan os meteorólogos, vai ser bo.


3.86/5 (7 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: