Vieiros

O proxecto segue as tres fases definidas no desenvolvemento do que na actualidade está considerado un importante monumento histórico do patrimonio artístico de Galiza.

Recrea o que sería o proceso de construción do primeiro conxunto de edificacións na zona, até a posterior construción da inicial igrexa medieval, xunto coa capela de San Miguel. Por último, chega até o edificio actual reparando no mosteiro románico intermedio. Virtualmente, pode seguirse en detalle a evolución histórica desde que xurdiu a obra en paralelo ao desenvolvemento do centro urbano de Celanova até conformar a vila actual.

De paso que se realizaba o estudo arquitectónico que documentou as fases iniciais do edificio, a que decorre entre os séculos X e XVI, os historiadores repararon nalgúns detalles importantes. De feito, segundo o equipo que realizou o traballo, o mosteiro de Celanova nunca fora obxecto até o de agora de estudos históricos a fondo sobre o terreo polo que, por exemplo, descoñecíase a localización exacta das vellas igrexas. Ao fío, a colaboración das universidades de Santiago e Vigo levou á creación dun equipo de arqueólogos e historiadores que programou varias sesións de traballo a pé do mosteiro.

Máis información na web Celanovavirtual.com.