Vieiros

Os galegos cobran mensualmente unha media de 1.362,9 euros ao mes sen pagas extras, o que coloca a comunidade como a cuarta cos salarios máis baixos, case 242 euros por debaixo da media estatal, situada nos 1.604,6 euros.

Segundo os datos do Instituto español de Estatística, INE, referidos ao primeiro trimestre de 2007, tan só Estremadura, Murcia e Canarias atópanse por debaixo de Galiza en custos salariais. Ademais, os soldos medraron no país un 3,7% con respecto ao mesmo período do ano pasado, seis puntos por debaixo da media do Estado (4,3%).

Menos que madrileños, que vascos e que cataláns
Con respecto aos territorios cos salarios máis elevados, un galego cobra de media ao redor de 650 euros menos que un madrileño, 500 euros menos que un vasco, e 350 euros menos que un catalán.

Porén, o aumento do custo salarial medio por hora si foi maior que o da media estatal, un 5,3% por un 4,6%. Deste xeito, a hora traballada págase a unha media de 9,6 euros, cantidade que chega até os 11,22 euros de media no Estado.

Por outra banda, as cotizacións obrigatorias á Seguridade Social en Galiza ascenderon até unha media de 523,19 euros, 70 euros por debaixo dos 593,8 da media estatal. Galiza é unha das catro zonas do Estado onde diminuíu esta ratio (-1,9%), namentres que no Estado medrou un 3,2%.