Vieiros

O Consello de Goberno acordou ampliar a colaboración coas tres universidades do país no marco da investigación As vítimas, os nomes, as voces e os lugares durante a xuntanza deste xoves. A Consellaría de Cultura e Deporte destinará 211.000 euros á segunda fase deste estudo sobre a represión en Galiza.

Entre as actuacións que se recollen está a análise, baleirado e incorporación á base de datos da información obtida en arquivos, rexistros, fichas sanitarias e fontes orais; a realización de entrevistas sobre a memoria transmitida; o tratamento informático dos fondos documentais; e a posta en valor do programa, coa organización de xornadas e publicacións. Toda a información será accesíbel a todo o público.

Comisión mixta
Os traballos do programa de investigación serán realizados por un equipo de investigación dirixido polo profesor Lourenzo Fernández Prieto do Departamento de Historia Contemporánea e de América da USC, e contarase cunha Comisión Mixta de Seguimento formada por representantes de cada unha das institucións.