Vieiros

Vieiros de meu Perfil


Edición xeral

RSS de Edición xeral
XA HAI ABERTAS DILIXENCIAS INFORMATIVAS

Denuncian na Fiscalía o chalé da xefa de Costas de Pontevedra

A asociación ecoloxista “Salvemos Pontevedra” acusa a Telmo Martín de modificar o PXOM de Sanxenxo para salvar esta casa a cambio de “favores políticos”.

Manuel Vilas - 13:51 17/04/2007

O colectivo “Salvemos Pontevedra” remitiu á Fiscalía do Tribunal Superior de Xustiza de Galiza (TXSG) un escrito no que denuncia a casa da Xefa do Servizo de Protección do Litoral do Ministerio de Medioambiente en Pontevedra, Cristina Paz-Curbera. Os ecoloxistas acusan ao Concello de Sanxenxo de adaptar irregularmente o PXOM para que parte da finca fose declarada zona urbanizable.

“Salvemos Pontevedra” argumenta que o Municipio de Sanxenxo reduciu o deslinde de costas para salvar a casa, facendo pasar o límite da zona na que se pode construír xusto pola fachada do chalé. O presidente da Asociación, Francisco Díaz, denuncia que esta modificación fíxose a cambio de “favores políticos”. O PXOM modificouse baixo o mandato do alcalde Telmo Martín, actual candidato do PP á alcaldía de Pontevedra.

Críticas contra Medio Ambiente
A ampliación da depuradora no río Lagares tamén é duramente criticada. Díaz considera que a actual instalación “é ilegal porque está no dominio público”. Por iso advirten que a súa ampliación -pactada entre o Concello de Vigo e a Xunta- suporía “a comisión con pleno coñecemento de causa de infraccións graves contra a Lei” e mesmo un delito de malversación pois “o destino da obra é o derrube segundo a xurisprudencia do Tribunal Supremo”.

No escrito, a Asociación arremete contra o conselleiro de Medio Ambiente, Manuel Vázquez, a quen acusa de “incumprir, no só o Pacto, se non a legalidade vixente en materia de urbanismo e medio ambiente”. O “pacto” refírese ao compromiso de Medio Ambiente para “facilitar ao 100% toda a documentación” á Xustiza sobre temas medioambientais. Os ecoloxistas entenden que o Goberno Galego non está actuando con transparencia en asuntos como o da casa da xefa de costas, a ampliación da depuradora de Vigo e a granxa acuícola de Cabo Vilán.

”Vertidos ilegais” en Camariñas
“Salvemos Pontevedra” lembra que as obras de Cabo Vilán, que recibiron subvención da Xunta, afectan á Rede Natura. Por iso piden á Fiscalía que actúe contra a a granxa de Stolt Sea Farm, situada preto de Camariñas, por “verquidos ilegais ao mar e o uso do dominio público marítimo-terrestre sen concesión”.

A asociación advirte que o borrador do Plan Acuícola da Xunta destina 336 hectáreas do litoral a un “uso industrial prohibido”. Ante esta situación, os ecoloxistas cualifican de “falacia proteccionista” a política do Goberno sobre costas.

A Fiscalía de Medio Ambiente de Santiago abriu dilixencias informativas a raíz dos feitos resumidos na nota de prensa de Salvemos Pontevedra, segundo Díaz.


Documentos

4,69/5 (13 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: