Vieiros

A USC acolle unhas xornadas sobre a literatura oral portuguesa: o mércores 28 de marzo, o profesor José Joaquim Dias Marques da Universidade do Algarve achegaranos ás "Lendas Urbanas na Tradição Oral Portuguesa”, ás 18.00 na Sala de Graos da Facultade de Filoloxía. Dias Marques é licenciado en Filoloxía Románica pola Facultade de Letras, Universidade de Lisboa, 1981, e doutourouse en Literatura, coa especialidade de Literatura Oral e Tradicional (F. C. H. S., Universidade do Algarve, 2003), coa tese A Génese do Romanceiro do Algarve de Estácio da Veiga. Ten feito recollas de campo en Bragança e Lisboa, e nos arquipélagos dos Açores e Madeira): Ademais do romanceiro, tense interesado tamén polas lendas urbanas contemporáneas.

E ao día seguinte, ás 19.00 na sala de aula 7 (segundo andar), remontámonos ás "Imagens e Sons do Romanceiro Português", da man de José Luís Forneiro, do Departamento de Filoloxía Galega. José Luís Forneiro é profesor titular de Lingua Portuguesa na USC e é autor dos libros El romancero tradicional de Galicia: una poesía entre dos lenguas (2000) e Allá em riba un rey tinha una filha. Galego e castelhano no romanceiro da Galiza (2004). Aquí podemos achegarnos á obra de Pere Ferré, do Instituto de Estudos sobre o Romanceiro Velho e Tradicional da Faculdade de Ciências Sociais e Humanas da Universidade Nova de Lisboa.