Vieiros

Segundo datos do instituto estatal de estatística (INE), en xaneiro no noso país contabilizáronse 280 terreos hipotecados por cada 100.000 habitantes, por debaixo do resto das comunidades do Estado. O extremo contrario ocúpano Murcia, con 693, e Canarias, con 684.

O importe medio das hipotecas galegas situouse no mes analizado en 117.746 euros, cun incremento do 13,2% con respecto a xaneiro de 2006. A proporción do aumento foi idéntica á do conxunto do Estado, aínda que o custo das hipotecas nese ámbito foi de 147.332 euros, un 17,3% á media de Galiza.

O noso país foi tamén onde se rexistraron menos cancelacións de hipotecas por cada 100.000 habitantes. Foron 131, por debaixo de Estremadura (131) e en oposición a Cantabria (290) e Baleares (278).

A nivel do Estado, durante xaneiro hipotecáronse 181.296 terreos rústicos e urbanos, un 5,2% máis ca no mesmo mes do ano anterior, por un valor de máis de 30.000 millóns de euros, un 20,8% superior. Tres de cada cinco hipotecas concedéronse dende caixas de aforros, outro 31,5% dende bancos e o resto noutras entidades financeiras. O tipo de xuro foi dunha media do 4,33% a un prazo de 26 anos.