Vieiros

Baía Edicións publica Auga que non vas beber..., obra gañadora do VII PREMIO BARRIGA VERDE de textos para teatro de monicreques (2009, modalidade adultos). Este libro destaca pola axilidade e a ironía dun texto dramático que entronca co "teatro de Cachaporra" na tradición de Barriga Verde, Blanco Amor e Dieste. O seu autor constrúe un musical satírico para monicreques que, inspirado na tradición oral anticlerical ibérica, conta os amoríos do Padre Damián, párroco de Agolada, cunha moi coñecida Carolina. Autor: Inacio Vilariño e ilustrador da capa: Calros Silvar.

Outro dos títulos que acaba de editar Baía Edicións para a mesma colección é Bon appétit, obra gañadora do VII PREMIO BARRIGA VERDE de textos para teatro de monicreques (2009, modalidade infantil). Esta obra é unha peza de estrutura clásica que ofrece un canto á gastronomía, en que están "moi ben aderezados" os ingredientes dramáticos e culinarios, ademais de adaptarse perfectamente ao teatro de monicreques. Autora: Begoña García Ferreira e ilustrador: Fran Pedreira.