Vieiros

Vieiros de meu Perfil


Edición xeral

RSS de Edición xeral
Manifestacións en capitais do mundo

Unión comunista contra a lei que veta os símbolos desta ideoloxía en Polonia

O novo artigo 256 do Código Penal prohibe producir, rexistrar, importar, vender, comprar, regalar, transportar ou envialos con fins propagandísticos.

Redacción - 09:30 17/06/2010
Donald Tusk, primeiro ministro polaco

Donald Tusk, primeiro ministro polaco

Comunistas de todo o mundo uníronse á campaña internacional dirixida polo Partido Comunista de Polonia en contra da normativa que prohibe os símbolos desta ideoloxía no país. Segundo informa o xornal Tercera Información realizáronse manifestacións de rexeitamento en Varsovia e en varias capitais do mundo, como Moscova, México DF, Londres, Atenas, Budapest ou Lisboa.

O pasado 8 de xuño aprobábase o novo artigo 256 do Código Penal polaco, que prohibe producir, rexistrar, importar, vender, comprar, regalar, transportar ou enviar simboloxía comunista con fins propagandísticos baixo penas que van desde a multa até os dous anos de cárcere

A norma foi impulsada polo executivo conservador do primeiro ministro polaco Donald Tusk. Polonia, canda Hungría, Lituania e Letonia, convértese no cuarto país do leste de Europa cun partido de dereita no goberno que ilegaliza a fouce e o martelo.

Desde o Partido Comunista de Polonia salientaron nun comunicado a gran cantidade de apoios recibidos desde dentro e fóra de Europa, con comunicados enviados desde Australia, Chile, Inglaterra, Dinamarca, Chipre e Paquistán, entre outros países.

Os comunistas gregos e bolivianos sinalan a crise económica como unha das causas da censura: "É unha mostra do temor das clases dominantes e dos monopolios capitalistas ante o rexurdimento do movemento obreiro e popular na Europa sacudida por unha profunda crise capitalista".

Tamén, segundo Tercera Información, o Partido Comunista dos Pobos de España (PCPE) enviou unha carta ás autoridades polacas exixindo a anulación destas modificacións do Código Penal e de calquera acción enfocada a equiparar o comunismo co fascismo.

Precisamente, a condena europea ao comunismo xurdiu de xeito oficial a finais do ano pasado, cando, para conmemorar os 20 anos da caída do muro de Berlín, a Carta de Praga, asinada por presidentes e parlamentarios europeos, equiparou os crimes do comunismo cos do fascismo.


Ligazóns

4,11/5 (9 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: