Vieiros

Xeólogos estadounidenses descubriron un inmenso depósito mineral que podería cambiar o curso da guerra de Afganistán. Segundo altos funcionarios do Goberno dos EUA, é importante de abondo como para alterar a economía afgá e a guerra que comezou hai case unha década.

Na información publicada este domingo por The New York Times afírmase que o depósito inclúe vastas vetas de ferro, ouro, cobre, cobalto e fundamentalmente litio. Minerais esenciais para a industria moderna, que poderían facer de Afganistán un país clave a nivel económico e mundial.

Un memorando interno do Pentágono, por exemplo, di que Afganistán se podería converter na "Arabia Saudita do litio", materia prima básica na fabricación de baterías para computadores portátiles e Blackberries.

Malia que se podería tardar anos en desenvolver unha industria mineira, o potencial é tan grande que os funcionarios e executivos do sector cren que podería atraer grandes investimentos, ofrecendo a posibilidade de postos de traballo e desviar así a atención da guerra.

Porén, desde a Casa Branca temen que o descubrimento se poida converter nunha arma de dobre fío, xa que en lugar de traer paz e estabilidade, podería levar os talibán a loitaren máis ferozmente polo rico territorio. Mais non só, tamén oligarcas vinculados ao presidente Hamir Karzai, que continúa a ser acusado de corrupción.