Vieiros

Dende a chegada do PPdeG ao Goberno, o Consorcio de Igualdade e Benestar creado na lexislatura do bipartito centra o debate político sobre os servizos sociais. Unha vez máis, os tres partidos con presenza parlamentaria discutiron o presente e futuro do ente público.

O BNG acusou ao executivo de recorrer a argucias legais para camiñar na privatización do consorcio. Así, o deputado Carlos Aymerich solicitou que os orzamentos deste organismo inclúan partidas económicas para a construción de novas infraestruturas e que se ateña aos procedementos públicos á hora de contratar o persoal. O PSdeG tamén foi crítico coa actitude da Consellaría de Traballo e Benestar, mais fixo fincapé no incumprimento de Feijoo, que tiña prometido na súa campaña electoral a disolución do organismo público.

A deputada conservadora Marta Rodríguez Arias aproveitou a ocasión para acusar ao BNG de ter practicado “política ficción” no Parlamento ao ter prometido “116 novas infraestruturas en 70 municipios diferentes”. Á vez acusou aos socialistas de “mirar para outro lado” mentres o Bloque xestionaba os servizos sociais.