Vieiros

As nanopartículas xa se empregan en aplicacións que van dende teas para a roupa até novos métodos terapéuticos contra o cancro. Porén, a súa utilización sobre o sector alimentario preocupa a moitos colectivos, como a Plataforma Galega Antitransxénicos, que alerta sobre a utilización desta tecnoloxía naqueles produtos destinados ao consumo humano.

No sector alimentario a nanobiotecnoloxía emprégase para mellorar o sabor dos alimentos ou para facelos menos perecedoiros. Tamén se utiliza nos alimentos procesados, reducindo a cantidade de graxa e sal que se precisa para a súa produción. Recentemente, o Grupo ETC (Grupo de Acción sobre Erosión, Tecnoloxía e Concentración) publicou un traballo sobre os potenciais perigos da aplicación destas técnicas na produción e transformación de alimentos no que adianta as posíbeis consecuencias destas tecnoloxías ao seren aplicadas á produción e transformación dos alimentos.

A Plataforma Galega Antitransxénicos achéganos algunhas das conclusións deste estudo e lamenta que "algúns alimentos, cosméticos, medicamentos ou pesticidas xa se estean producindo con esta tecnoloxía e vendendo impunemente, utilizando ao conxunto da Humanidade como unha inmensa cobaia, sen saber ao que se expón e sen o seu consentimento". Ademais, explican que "este feito en si tería que ser considerado un delito contra a saúde pública e perseguíbel de oficio pola nosa querida e cega Xustiza".

• Máis información no estudo do Grupo ETC: O impacto das tecnoloxías nanoscópicas na alimentación e na agricultura