Vieiros

As enerxías limpas forneceron o 35,9% de todo o consumo de enerxía eléctrica en Portugal durante o ano 2009, segundo as cifras achegadas polo organismo Redes Energéticas Nacionais (REN). Con eses números, aparece próximo o obxectivo fixado polo executivo portugués liderado polo primeiro ministro José Sócrates, quen ten subliñado a intención de que ao remate de 2010 o 45% do consumo eléctrico do país sexa abastecido por enerxías renovábeis.

A REN salienta tamén neste inicio do ano o balance que nos últimos doce meses levou a Portugal a converterse no segundo país do mundo en canto a aproveitamento eólico. O feito de que de cada 100W de electricidade consumidos nos fogares portugueses, 15 foran xerados polo vento, coloca así a Portugal por riba do Estado español e só atrás de Dinamarca. De cada 24 horas de consumo enerxético, un promedio de 3 horas e 36 minutos foron garantidos polos muíños de vento, un incremento do 31% respecto das cifras de 2008.

Recomendámoslles ampliar na información do diario Público.