Vieiros

"A única achega do goberno de Feijoo á acuicultura de Galiza é o freo e a marcha atrás de todos os investimentos previstos, amais do anuncio da ocupación do noso patrimonio medioambiental, a desmoralización do sector e o abandono por parte dos emprendedores", afirmou Marisol Soneira, voceira en materia de Pesca do grupo parlamentario do PSdeG.

Soneira acusou o presidente de "mentir, manipular e terxiversar a realidade" en sede parlamentaria cando anunciou este mércores a apertura da planta acuícola de Muros. "Núñez Feijoo é a encarnación do cinismo político e da manipulación, xa que asegurou no Parlamento que mañá o Consello da Xunta aprobaría a primeira planta acuícola dende o goberno de Manuel Fraga", reproboulle Soneira. A deputada socialista argumentou que os únicos proxectos acuícolas aprobados por Feijoo son o de Insuiña (Pescanova) en Oia, cuxo expediente herdou do goberno anterior, "e co cal solo tivo que cumprir cun trámite previamente estabelecido", e a planta que "supostamente vai aprobar maña no Consello da Xunta, en Muros". Unha planta esta última que, subliña Soneira, foi aprobada no Consello da Xunta do pasado 12 de marzo.