Vieiros

Vieiros de meu Perfil


Edición xeral

RSS de Edición xeral
RECTIFICACIÓN

Feijoo recúa e asegura que manterá os 200 euros dos pensionistas

Emenda á súa conselleira de Benestar, Beatriz Mato, quen anunciara a eliminación deste complemento porque non era máis que "un parche".

Redacción - 12:50 28/10/2009
Feijoo, antes da crispada sesión de control no Parlamento

Feijoo, antes da crispada sesión de control no Parlamento

O Goberno manterá en 2010 o complemento de 200 euros para as pensións non contributivas. Así o anunciou o presidente da Xunta, Alberto Núñez Feijoo, quen emendou así ás declaracións feitas esta fin de semana pola conselleira de Benestar, Beatriz Mato, nas que anunciaba a eliminación deste suplemento posto en marcha polo bipartito e do que se beneficiaban 51 mil pensionistas.

Feijoo foi aínda máis alá e comprometeuse, non só a manter estas axudas, senón a "incrementalas de acordo co IPC" que se aplique ás pensións do Estado Español. Ademais, asegurou que os orzamentos para o vindeiro ano xa reservan unha partida para sufragar o mantemento deste complemento ás pensións non contributivas e que consta "na mesma partida que no orzamento do ano pasado". Este último anuncio foi o que xerou a maior crispación. "Vostede é un mentireiro", dixo o líder do PSdeG, Manuel Vázquez.

Crispación e acusacións

Nos orzamentos de 2009, elaborados polo bipartito, na sección 23 aparece especificamente "Gastos de diversas Consellarías", cunha partida chamada "Fondo extraordinario de axudas aos beneficiarios de pensións e subsidios non contributivos" de 10 millóns de euros. Nas contas de 2010 non figura ese mesmo nome. Ao parecer, ese será o destino que se lle dará a outro fondo de continxencia, que prevé un gasto de 20 millóns de euros.

O portavoz do PPdeG, Manuel Ruiz Rivas, explicou ao remate da sesión que "os cartos para as persoas máis necesitadas sempre estivo aí" e que a Xunta debateu nos últimos días se era máis conveniente "prestar servizos directamente ou empregar os cargos en subsidios", e finalmente Feijoo decantouse pola segunda opción. Ruíz Rivas insistiu en que "non se lle pode dar máis importancia ás formas que ao fondo".

Polo BNG, Carlos Aymerich dixo que "o cinismo, a hipocrisía e a insensibilidade da dereita non ten límites" e insistiu en que "o presidente da Xunta mentiu, porque nos orzamentos non había ningunha partida similar á aprobada no mesmo sitio que dixo Núñez Feijoo".


4.83/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: