Vieiros

A Comisión de Economía do Senado aprobou por unanimidade unha proposición non de lei impulsada polo BNG e pactada cos demais grupos para que o goberno español "valore a posibilidade" de limitar a "aplicación indiscriminada" do réxime fiscal especial do que se benefician futbolistas e deportistas de elite estranxeiros, a coñecida como 'Lei Beckham'.

Aínda que o BNG pedía inicialmente a supresión deste réxime especial para os salarios superiores aos 55 mil euros, que tributan a un tipo do 24%, o senador Xosé Manuel Pérez Bouza amosouse satisfeito co acordo "unánime" da cámara alta, por supoñer un "primeiro paso". Hai meses o PSOE rexeitou unha iniciativa semellante presentada por IU-ICV.

O texto consensuado introduce a precisión de que só se limitaría a aplicación do réxime especial no caso de que se perciban "retribucións por importes elevados", e sen prexudicar a "competitivade" da economía do Estado Español. Insta, deste xeito, a analizar se é axeitado o artigo 93 da lexislación do IRPF, en relación coa tributación que se aplica en estados veciños para favorecer a contratación de persoal cualificado estranxeiro. Precisamente, o que se pretende é facer unha distinción entre o caso de investigadores, científicos e outro persoal cualificado e o dos futbolistas, que cobran cantidades máis elevadas.