Vieiros

Tras sortear a crise económica, concederase un total de 120 mil dólares americanos en premios. Porén, este ano eliminouse do programa a competición feminina debido á ausencia de campeonatos complementarios no Tour europeo. O torneo contará con algunhas das máis importantes figuras do surf e co vigués Gony Zubizarreta coma principal atractivo no plano de riders nacionais. O surfista galego impúxose no San Miguel Pro Zarautz, tras gañar a final ao australiano Blake Thornton. Con este resultado Gony chega a Pantín no mellor momenta da súa carreira. O vigués podería converterse no primeiro galego da historia en acceder á máxima proba a nivel internacional.

O surf ten en Ferrolterra o principal enclave galego para a súa práctica. É na zona ferrolá onde este deporte acada a maior popularidade de toda Galiza e onde se proxecta internacionalmente dende 1988. Desta proba, que naceu con vocación de continuidade e que organiza o decano de clubes de surf do país, Océano Surf Clube, pode afirmarse que chegou a converterse en todo un clásico, tal e coma apunta o seu nome. Marcos Rodríguez, director da proba, agradeceu, na posta de longo, o apoio dos patrocinadores privados. Segundo Rodríguez, o surf move a moita xente que se achega de todas partes do mundo axudando ao sector hosteleiro e propiciando o desenvolvemento do turismo no país.