Vieiros

Vieiros de meu Perfil


Edición xeral

RSS de Edición xeral
Ocultación das estatísticas

As cifras dos lumes, como os cantos de reis: se cadra para o Nadal

Deica fin de ano non haberá datos polo miúdo. "Canto máis presenza mediática ten o tema, máis risco de incendios hai", argumentan desde a Xunta.

Redacción - 19:15 20/08/2009

"Decidiuse non facilitar información xenérica sobre incendios para non fomentar a actividade incendiaria, habida conta de que está demostrado que canto maior presenza mediática ten esta cuestión, maior é tamén o risco de que se incrementen o número e importancia dos lumes". Tal é a argumentación desde a Consellaría do Medio Rural para negar os datos da administración pública ao respecto da incidencia dos lumes no que vai de ano e mesmo no actual verán. Deste xeito, o Goberno non agardan que antes da fin do verán se faga público o balance completo coas cifras concretas da incidencia do lume nos montes aínda que aseguran que a previsión é que este balance se ofreza a finais de ano.

A insistencia do argumento co que, subliñan, a consellaría xa xustificou "en reiteradas ocasións" a decisión de non facilitar información polo miúdo sobre incendios, é lembrada por Medio Rural este xoves ao tempo que negan ter afirmado que o recente incendio en Vilardevós fora o maior deste ano en Galiza. Recordan que só ofrecerán información de cada lume concreto polo que sexan requiridos e só o farán "automaticamente" cando o incendio supere, como no caso de Vilardevós, as 20 hectáreas de superficie afectada.

Con todo, e exemplo do apagamento informativo, é a imposibilidade de saber cal foi o maior incendio no país desde principio de ano segundo os datos manexados pola Xunta. Insisten, "o de Vilardevós foi só o maior do verán". Ao respecto, remítense ás declaracións dun axente forestal lugués que esta semana sinalaba que o peor lume en cuxa sufocación el traballou foi en Palas de Rei o pasado mes de marzo e afectoulle a 735 hectáreas, mais non aclaran se teñen constancia doutro maior. Pero, teiman, non se dará cifra global de superficie queimada en todo o país, cando menos até finais de 2009.


1/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



En 2006 na vaga entre a primeira e segunda semana de agosto, este era o mapa por concellos segundo a intensidade do ataque do lume atendendo aos datos que daquela daba Medio Rural
En 2006 na vaga entre a primeira e segunda semana de agosto, este era o mapa por concellos segundo a intensidade do ataque do lume atendendo aos datos que daquela daba Medio Rural