Vieiros

Irmáns, pais, nais e fillos saharauís levan ás veces lustros sen verse debido ás restricións marroquís para o seu libre desprazamento entre o Sáhara Occidental e os campamentos de Tinduf. A única fiestra aberta, os voos organizados polas Nacións Unidas, mais escasos e cada moito tempo e que acumulan longas listas de espera.

O compromiso para que as familias saharauís poidan agora viaxar por terra, baixo supervisión da ONU, é así a principal novidade saída da xuntanza das delegacións do goberno de Marrocos e da Fronte Polisario, organizada pola delegación da ONU para o Sáhara e celebrada en Austria. Por outro lado, no miolo do debate político non transcendeu avance ningún, non sendo o cambio de ton e a diminución da belixerancia nos discursos. En calquera caso, Marrocos segue mantendo inamovíbel a proposta de autonomía baixo a súa soberanía e a Polisario insiste no dereito a convocar un referendo de autodeterminación.